Yaqindagina Rossiya poytaxti Moskva shahrida Mehribonlik uylarida tarbiyalanayotgan bolalar o‘rtasidagi Jahon chempionati bo‘lib o‘tdi. Unda ilk bora O‘zbekiston terma jamoasi ham ishtirok etdi.
Hamyurtlarimiz o‘zlarining ilk ishtiroki bo‘lishiga qaramay barcha raqiblarini mardonavor tarzda mag‘lub etishdi va yakunda Jahon chempioni unvoniga ega chiqishdi. Jamshid Asadov shogirdlari ushbu turnirda yurtimiz sharafini munosib himoya etishning uddasidan chiqishdi.
Qo‘lga kiritilgan bunday muvaffaqiyat “Lokomotiv” professional futbol klubi rahbariyati va hodimlarini ham befarq qoldirmadi. Zero “Lokomotiv” PFK joriy yil avvalidan buyon poytaxtimizda joylashgan 23-sonli mehribonlik uyi futbol jamoasini har tomonlama qo‘llab-quvatlab, ularga homiylik qilib kelmoqda. Mundialda ishtirok etgan terma jamoamiz o‘zagini ham ushbu mehribonlik uyi tarbiyalanuvchilari tashkil etishdi.
Muborak Ramazon oyi davom etayotgan ushbu qutlug‘ kunlarda “Lokomotiv” PFK Jahon chempionligini qo‘lga kiritgan mehribonlik uyi tarbiyalanuvchilari uchun iftorlik dasturxoni yozdi. Bugun terma jamoamiz vakillari “Lokomotiv” stadioniga tashrif buyurishdi. Ular klub qarorgohida “Lokomotiv” asosiy tarkibi futbolchilari hamda murabbiylari bilan suhbat qurib, Jahon chempionati taassurotlari bilan o‘rtoqlashishdi. Katta akalari esa ushbu yosh futbolchilarga kelajakda ulkan muvaffaqiyatlar tilashdi.
“Sizlar o‘zingizdan kutilgan o‘yinni namoyish eta oldingiz va Jahon chempionatida O‘zbekiston sharafini munosib himoya qildingiz. Sizlar bilan har qancha farxlansa arziydi. Sizdek futbolga ulkan mehr qo‘ygan yigitlarga kelajakda ulkan muvvaffaqiyatlar tilaymiz. Hali katta futbolda ham yaxshi natijalar qayd etishingizga ishonamiz”, – dedi “Lokomotiv” PFK bosh murabbiyi vazifasini bajaruvchi Andrey Fyodorov.
“Ukalarim, Jahon chempionatidagi ajoyib o‘yiningiz uchun sizga tashakkur. Sizlarda ulkan iqtidor bor ekaniga amin bo‘ldik. Kelajakda sizlardan milliy terma jamoada ham o‘ynaydigan mashxur futbolchilar yetishib chiqishiga tilak bildiramiz”, – dedi Oleg Zoteev.
