Xabaringiz bor, O‘zbekiston Respublikasi Davlat soliq qo‘mitasi raisi Botir Parpiyev 14 yil deganda o‘z kursisini o‘rinbosari Behzod Anvarovich Musayevga bo‘shatib bergan edi. Shundan keyin 71 yashar Parpiyev Fuqarolarning o‘zini o‘zi boshqarish organlari faoliyatini muvofiqlashtirish bo‘yicha Respublika Kengashi raisining Keksalar va faxriylar ishlari bo‘yicha o‘rinbosari lavozimini egalladi.

Joriy yilning 19 may kuni u yana bir lavozimni tark etdi. Gap shundaki, u O‘zbekiston taekvondo WTF assosiasiyasi prezidenti lavozimidan ham ketdi.

Shu kuni Milliy olimpiya qo‘mitasida O‘zbekiston taekvondo WTF assosiasiyasining navbatdan tashqari saylov Konferensiyasi bo‘lib o‘tdi.

Keyin esa u taekvondo (WTF) assosiasiyasi rahbarligi uchun shu kungacha O‘zbekiston taekvondo (ITF) milliy assosiasiyasi prezidenti lavozimida faoliyat ko‘rsatib kelgan Laziz Saydivaliyevich Hasanov nomzodini ko‘rsatdi. Qizg‘in bahs munozaralardan so‘ng Laziz Hasanov nomzodi qo‘llab-quvvatlandi va u O‘zbekiston taekvondo WTF assosiasiyasi prezidenti lavozimiga saylandi.

O‘z navbatida yangi rahbar oldiga ma’lum talab va vazifalar qo‘yildi. Jumladan, Laziz Hasanov qisqa vaqt ichida terma jamoalarga iqtidorli sportchilar yetkazib berish tizimini qayta ko‘rib chiqishi, murabbiylar malakasini oshirishga e’tiborni kuchaytirishi, Osiyo va Olimpiya o‘yinlari kabi nufuzli musobaqalarda o‘zbekistonlik taekvondochilarning muvaffaqiyatli ishtirok etishi uchun zarur choralar ko‘rishi kerak bo‘ladi.

Darvoqe, O‘zbekiston taekvondo WTF assosiasiyasi prezidenti o‘zgarganiga 3 kun bo‘ldi, biroq tashkilot saytining rahbariyat bo‘limidagi ma’lumotlar o‘zgarishsiz qolmoqda. Unda ham Parpiyev prezident sifatida ko‘rsatilgan.