Jizzax viloyatining Zafarobod tumanida viloyat ochiq turniri musobaqasi yakuniga yetdi. Ushbu musobaqa Jismoniy tarbiya va sport boshqarmasi, viloyat huquqni muhofaza qilish organlari, Zafarobod tuman hokimligi, Jizzax viloyati boks federasiyasi, O‘zbekiston Yoshlar ittifoqi Zafarobod tuman kengashi, Zafarobod tuman Moliya bo‘limi bilan hamkorlikda tashkil etildi.

Musobaqada Qozog‘iston va Tojikiston Respublikalari, Andijon, Farg‘ona, Toshkent va Jizzax viloyatlaridan tashrif buyurgan 320 nafardan ortiq sportchi yoshlar qatnashdi.

Turnirda 2003-2004 yillarda tug‘ilgan yoshlar o‘rtasida 11 ta vazn toifasida, 2005-2006 yillarda tug‘ilgan yoshlar o‘rtasida 8 ta vazn toifasi bo‘yicha o‘tgan qizg‘in bellashuvlar yakuniga ko‘ra Jizzax viloyati jamoasi birinchi, Toshkent viloyati ikkinchi, Tojikiston Respublikasi jamoasi esa uchinchi o‘rinni egalladi.

Musobaqa g‘olib va sovrindorlari hamkorlar tomonidan ta’sis etilgan esdalik sovg‘alar, I-II-III-darajali medal va diplomlar, qardosh davlat murabbiylari esa viloyat va tuman hokimligining ramziy sovg‘alari bilan taqdirlandi.