Germaniyaning ZDF sport telekanali Yevropa chempionlar ligasi finalida “Liverpul” darvozaboni Loris Kariusning ikki bor qo‘pol xatosiga sababchi kim ekanligini aytdi.
 
“Real”ning 3:1 hisobida g‘alaba qozongan o‘yinda Serxio Ramos birgina Muhammad Salohni jarohatlamagan ekan. U uchrashuvning 49-daqiqasida “Liverpul” posbonining jag‘iga tirsagi bilan zarba berib, Kariusni muvozanatni yo‘qotishiga sababchi bo‘lgan.
 



 
Vaziyatdan ikki daqiqa o‘tib, ya’ni 51-daqiqada darvozabonning “boshi gangib” to‘pni shundoqqina Karim Benzemaning oyog‘iga tashlab bergan.
 
Keyinchalik esa Beylning uzoqdan bergan zarbasini to‘sishda ham dastlab, qo‘llarini musht qilib, so‘ng ushlab olishga harakat qilgan. Bir qarorga kela olmaganligi oqibatida esa gol o‘tkazib yuborgan.
 
ZDF Serxio Ramosning Kariusni tirsagi bilan urgani, posbonni  xatolarga yo‘l qo‘yishiga sabab bo‘lgan, deya baholamoqda.
 
Ma’lumot uchun, “Real” sardori o‘yinning 29-daqiqasida “Liverpul”ning asosiy figurasi hisoblanmish Muhammad Salohni ham jarohat olishiga sababchilardan bo‘lgan edi.