Ertaga Qoraqalpog‘iston poytaxti Nukus shahrida «1-iyun bolalarni himoya qilish kuni»ga bag‘ishlangan katta sport festivali o‘tkaziladi.

Ushbu festival doirasida turli sport tadbirlari tashkil qilinishi, shuningdek, maktabgacha ta’lim muassasalari va mehribonlik uyi tarbiyalanuvchilariga prezident sovg‘asi taqdim etilishi ko‘zda tutilgan. Asosiy tantanalar shahar markazidagi «Turon» stadionida bo‘lib o‘tadi.

Soat 19:00da boshlanadigan tadbirda estrada xonandalari o‘z chiqishlari bilan yig‘ilganlarga yuqori kayfiyat taqdim etadilar. Shuningdek, sportchi va mashhur qo‘shiqchilar maktabgacha ta’lim muassasasi va mehribonlik uyi tarbiyalanuvchilariga, futbol festivali, velopoyga va marafon ishtirokchilariga prezident sovg‘alarini ulashadilar. Soat 20:00dan so‘ng Azamat Abduraimov boshchiligidagi O‘zbekiston o‘smirlar terma jamoasi Qoraqalpog‘iston va Xorazm viloyati futbolchilaridan tashkil topgan futbolchilarga qarshi kurash olib boradi.

Ushbu sport bayramida ishtirok etish uchun o‘zbek estradasining taniqli yulduzlari ham Nukusga yetib borishgan. Bugun delegasiya a’zolari Islom Karimov nomidagi Toshkent xalqaro aeroportidan jo‘nab ketishgandi. Ularni Nukus aeroportida sport jamoatchiligi va milliy libosdagi qizlar kutib olishdi. Tadbirda shuningdek, o‘zbek futboli yulduzlari Eldor Shomurodov, Otabek Shukurov, Doston Hamdamov va Jamshid Iskanderovlar ham ishtirok etadi. Qolaversa, murabbiy Ravshan Haydarov ham delegasiya bilan birga Nukusga yetib borgan.