«Sho‘rtan» - «Dinamo» (0:3) uchrashuvidan keyin “Dinamo” bosh murabbiyi Davron Fayziyev o‘yin borasidagi fikrlarini bildirdi.

“G‘alaba qozonish har doim yoqimli, lekin g‘alaba bilan mag‘lubiyat har doim yonma-yon yuradi. Meni quvontirayotgani jamoamiz tobora o‘z o‘yinini topib borayotgani. Hozirda hech qanday bo‘shashga haqimiz yo‘q. Sababi oldinda bizni muhim bahslar kutib turibdi. Bu g‘alaba bizni yanada kuchaytirishi kerak. Yigitlarda o‘zlariga ishonch yana qaytayotganidan xursandman. O‘ylaymanki, endi shu tempni saqlab qolib, ishlashda davom etamiz.

Chindanam bugungi “Sho‘rtan” ustidan qozonilgan g‘alaba “Dinamo”ning joriy mavsumdagi eng muhim g‘alabasi va eng chiroyli o‘yinlaridan biri bo‘ldi. Lekin bu bilan to‘xtab qolish yaramaydi. Oldinda “Surxon”ga qarshi muhim bahs kutib turibdi. Ertadanoq o‘yinga tayyorgarlik ko‘ramiz.

Bugungi g‘alabamizda bizni har qanday holatda ham qo‘llab-quvvatlayotgan muxlislarimizning ham hissalari bor. Samarqanddan G‘uzorga kelib stadionda jamoani qo‘llab turganliklari yigitlarga ta’sir qildi. “Dinamo” o‘z muxlislarini xursand etishi uchun ishlashda davom etamiz” – deya fikrini yakunladi Davron Fayziyev.