Umid Ahmadjonov rahbarligidagi Markaziy Osiyo Futbol Assosiasiyasi (MOFA) rasmiy veb-saytini ishga tushirdi. Veb-sayt internetda www.the-cafa.com manzilida joylashgan bo‘lib, “Codelab” kompaniyasi tomonidan ishlab chiqildi.
Markaziy Osiyo Futbol Assosiasiyasiga 2014 yilda asos solingan bo‘lib, u OFK Ustavi asosida qit’aning tan olingan 5 ta mintaqasidan biri sanaladi. Ushbu assosiasiyaga Afg‘oniston, Tojikiston, Turkmaniston Eron, Qirg‘iziston va O‘zbekiston futbol assosiasiyalari a’zo sanaladi.
2018 yilning fevral oyida tashkilotning navbatdan tashqari Kongressida O‘zbekiston Futbol Assosiasiyasining birinchi vise-prezidenti Umid Ahmadjonov yangi prezident etib saylandi. Shundan buyon tashkilot ulkan hajmdagi ishlarni amalga oshirdi.
MOFA tarixida birinchi marta Markaziy Osiyo mintaqasi mamlakatlari uchun musobaqalar va tadbirlar taqvimi ishlab chiqildi va u tashkilotga a’zo federasiyalar tomonidan tasdiqlandi. Ushbu tadbirlar rejasi asosida MOFA shu yilning o‘zida 4 ta MOFA chempionati, bundan tashqari tarixda birinchi marta hakamlik va murabbiylik kurslarini o‘tkazishni rejalashtirgan. Shu sababli ham bugungi kunda MOFAning ushbu davrini FIFA hamda Osiyo Futbol Konfederasiyasi “Yangi ibtido” deb tan olayapti.
