O‘zbekiston futbol assosiasiyasi yurtimizda malakali murabbiylarni tayyorlash, ularning saviyasini muntazam ravishda oshirib borish maqsadida yurtimizning barcha viloyatlarida OFK va O‘FAning murabbiylik lisenziyalariga ega mutaxassislarning kasbiy malakasini aniqlash bo‘yicha seminarlar tashkil qilib kelmoqda.
Navbatdagi seminarga bugun Buxoro viloyatida start berildi. Buxoro Olimpiya zaxiralari kollejining majlislar zalida tashkil qilingan seminarda viloyatning BO‘SM, IBO‘SM va sport muassalarida faoliyat olib borayotgan murabbiylar, Buxoro viloyat futbol assosiasiyasining vakillari ishtirok etishmoqda.
Kunning ikkinchi qismida barcha murabbiylardan bilim va ko‘nikmalari bo‘yicha imtihon olinadi. Ertaga amaliy mashg‘ulotlar o‘tkazish rejalashtirilgan. Imtihonlar natijalariga ko‘ra murabbiylik faoliyati bilan shug‘ullanish talabiga javob bermaydigan mutaxassislar tegishli murabbiylik sertifikatlari va lisenziyalaridan mahrum qilinadi.
Seminarni O‘zbekiston futbol assosiasiyasining murabbiylar tayyorlash bo‘limi boshlig‘i Shovkat Imamov hamda instruktor Usmon Toshevlar olib borishmoqda.
