Pro-liganing 14-turida Urganchning «Xorazm» klubi Samarqandning «Dinamo» klubini qabul qildi.
O‘yin murosasiz kurashlarga boy tarzda o‘tdi. Bahsda mehmonlar biroz tashabbusga ega bo‘lsa-da, urganchliklar yaratilgan vaziyatlardan samaraliroq foydalanishdi.
Hisob 24-daqiqada Yerbol Seytnazarov tomonidan ochildi. Ikkinchi bo‘limda Jasur Azimov uzoq masofadan zarba yo‘llab, chiroyli gol urdi va hisobni tenglashtirdi. 83-daqiqada zaxiradan tushgan Sardor Matmuratov yana mezbonlarni hisobda oldinga olib chiqdi. O‘yinning so‘nggi daqiqasida esa «Dinamo» penaltidan hisobni tenglashtirdi. Ammo mezbonlar g‘alaba uchun bor kuchini tashlab, hakam tomonidan qo‘shib berilgan daqiqalarda g‘alabani ilib ketishdi. Yerbol Seytnazarov jarima maydoni ichida faol harakat qilib, «Xorazm»ga g‘alaba keltirgan golni urdi.
Bu o‘yinga xorazmlik muxlislar alohida tayyorgarlik ko‘rib, Pro-liga bahslaridagi eng katta bannerni tayyorlab kelishdi, deb xabar beradi "Xorazm" futbol klubi muxlislari telegram kanali. Unga Jaloladdin Manguberdi tasviri tushirilgan bo‘lib, «Olg‘a «Xorazm», muxlislar sen bilan birga» degan xitob yozilgan edi. O‘yin davomida fanatlar milliy cholg‘u asboblarini chalib, futbolchilarni chiroyli tarzda qo‘llab-quvvatlab turishdi.
Pro-liga, 14-tur
11 iyun, Urganch, Yoshlik stadioni, 920 tomoshabin
Xorazm (Urganch) - Dinamo (Samarqand) - 3:2
Gollar: Yerbol Seytnazarov 24, - 1:0. Jasur Azimov 56, - 1:1. Sardor Matmurotov 83, - 2:1. Ilhom Yunusov 89 penalti, - 2:2. Yerbol Seytnazarov 90+1, - 3:2.
