Про-лиганинг 14-турида Урганчнинг «Хоразм» клуби Самарқанднинг «Динамо» клубини қабул қилди.
Ўйин муросасиз курашларга бой тарзда ўтди. Баҳсда меҳмонлар бироз ташаббусга эга бўлса-да, урганчликлар яратилган вазиятлардан самаралироқ фойдаланишди.
Ҳисоб 24-дақиқада Ербол Сейтназаров томонидан очилди. Иккинчи бўлимда Жасур Азимов узоқ масофадан зарба йўллаб, чиройли гол урди ва ҳисобни тенглаштирди. 83-дақиқада захирадан тушган Сардор Матмуратов яна мезбонларни ҳисобда олдинга олиб чиқди. Ўйиннинг сўнгги дақиқасида эса «Динамо» пенальтидан ҳисобни тенглаштирди. Аммо мезбонлар ғалаба учун бор кучини ташлаб, ҳакам томонидан қўшиб берилган дақиқаларда ғалабани илиб кетишди. Ербол Сейтназаров жарима майдони ичида фаол ҳаракат қилиб, «Хоразм»га ғалаба келтирган голни урди.
Бу ўйинга хоразмлик мухлислар алоҳида тайёргарлик кўриб, Про-лига баҳсларидаги энг катта баннерни тайёрлаб келишди, деб хабар беради "Хоразм" футбол клуби мухлислари телеграм канали. Унга Жалоладдин Мангуберди тасвири туширилган бўлиб, «Олға «Хоразм», мухлислар сен билан бирга» деган хитоб ёзилган эди. Ўйин давомида фанатлар миллий чолғу асбобларини чалиб, футболчиларни чиройли тарзда қўллаб-қувватлаб туришди.
Про-лига, 14-тур
11 июнь, Урганч, Ёшлик стадиони, 920 томошабин
Хоразм (Урганч) - Динамо (Самарқанд) - 3:2
Голлар: Ербол Сейтназаров 24, - 1:0. Жасур Азимов 56, - 1:1. Сардор Матмуротов 83, - 2:1. Илҳом Юнусов 89 пенальти, - 2:2. Ербол Сейтназаров 90+1, - 3:2.
