JCH-2018 mezboni — Rossiya terma jamoasi muddatidan avval pley-off yo‘llanmasini qo‘lga kiritishga juda yaqin turibdi. Ikkinchi turni ochib beruvchi bahsda ruslar Misrga qarshi bahs olib borib, ishonchli tarzda g‘alaba qozondi.

Birinchi bo‘limda har ikkala jamoa juda katta kuch sarfladi. Saloh boshchiligidagi misrliklar raqib himoyasini ancha qiynadi. Ayniqsa, tanaffus yaqin Muhammad jarima maydonchasi chizig‘i ustidan xavfli zarba yo‘llashga muvaffaq bo‘ldi. Rossiyaliklar baxtiga to‘p ustun yonidan o‘tib ketdi.

Ikkinchi bo‘limning starti esa Misr termasi uchun muvaffaqiyatsiz keldi. Dzyuba olis masofadan darvoza tomon unchalik kuchli bo‘lmagan zarba berdi, to‘p esa Fathiyning oyog‘iga tegib, to‘rga borib tushdi — 1:0.

Bu gol ruslarda o‘ziga bo‘lgan ishonchni oshirib yubordi. Natijada bahsning 59 va 62-daqiqalarda mezbonlar ikkita gol urib, amalda o‘yin taqdirini hal qilib qo‘yishdi. Dastlab Mario Fernandes o‘ng qanotdan jarima maydonchasiga kirib, 11 metrli nuqta atrofiga uzatma berdi. Cherishevning zarba yo‘llashiga hech kim xalal bermadi — 2:0.

Oradan 3 daqiqa o‘tib Kutepev yuqoridan raqib jarima maydonchasiga uzatma berdi. Artyom Dzyuba to‘pni ko‘kragi bilan o‘ziga bo‘ysindirdi, bir himoyachini aldab o‘tdi va aniq zarba bilan hisobni 3:0ga yetkazdi.

O‘yin tugashiga 17 daqiqa qolganida paragvaylik hakam Rossiya darvozasi tomon dastlab jarima maydonchasi tashqarisida jarima zarbasi belgiladi. Keyin esa videotakrorlar bo‘yicha mutaxassislarning yordami bilan qarorni penaltiga o‘zgartirdi. Muhammad Saloh jahon chempionatidagi dastlabki golini urishga muvaffaq bo‘ldi.

Misrning boshqasiga kuchi yetmadi. Rossiya terma jamoasi esa o‘z ochkolarini 6taga yetkazib, nimchorak final yo‘llanmasini deyarli hal qilib qo‘ydi.

JCH-2018. "A" guruhi, 2-tur
Rossiya – Misr 3:1 (0:0, 3:1)
Gollar: 1:0 – 47, avtogol Fathiy, 2:0 – 59 Cherishev, 3:0 – 62 Dzyuba, 3:1 – 73, penalti Salax.
Rossiya – Akinfeev, Fernandes, Kutepov, Ignashevich, Jirkov (Kudryashov, 86), Gazinskiy, Zobnin, Samedov, Golovin, Cherishev (Kuzyayev, 74), Dzyuba (Smolov, 79).
Misr  – El-SHenaviy, Fathiy, Gabr, Xegaziy, Abdel-SHafiy, El-Nenni (Uarda, 64), Hamid, Muhammad Saloh, El-Said, Trezege (Sobxi, 68), Muxsin (Kaxraba, 82).
Ogohlantirishlar: Trezege (57), Smolov (84).