Rossiya yashil maydonlarida kechayotgan shiddatli o‘yinlarni kuzata turib shuni sezdimki, hamma futbol o‘ynashni o‘rganib boryapti. Taxminimcha, yana 3 yillardan so‘ng deyarli autsayder termalar qolmasa ham kerak. Lekin meni hammasidan ham grandlarning qiyin o‘tkazayotgan o‘yinlaridan taajjubdaman.

Barchasidan ham Argentinaning oqsayotgani meni hayratlantirdi. Lekin bu shunchaki nisbiylik xolos. Ularning haqiqiy kuchini hali ko‘rganimizcha yo‘q. Sezgan bo‘lsangiz, xorvatlar bilan bo‘lgan o‘yinda ham golgacha juda ishonchli o‘yin ko‘rsatishayotgandi. Lekin qo‘pol xato hammasini o‘zgartirib yubordi. Qolgani o‘z-o‘zidan kela boshladi...

Mayli, bugun bu haqida emas, hamamizni qiynagan boshqa savolga javob izlashga harakat qilamiz. Xo‘sh, Argentinaning bor kuchi shumi? Qiziq savol-a? Hozir maqolani o‘qiyotganlarning deyarli 80 foizi «ha»deb ichida javob berishga ulgurdi.

Men esa unday fikrda emasman. To‘g‘ri, ichki nizolar hozir ularda avjiga chiqqandir, to‘g‘ri, murabbiy va Messining o‘zaro nizolari kiyinish xonasidan tortib, biz jurnalistlarning qulog‘igacha eshitilayotgandir, hatto Argentina 3-turda maydonga murabbiysiz chiqishi ham mumkin bo‘lib turgan bir paytda ham bu jamoa — Argentina!

Mayli, hozir Maradonasiz qolgan bo‘lsin, mayli hozir Batistutadek hujumchisi bo‘lmasin, lekin bu jamoa shunday afsonalarni bizga yetkazgan yurtning terma jamaosi. Ularni hurmat qilmaslik, menimcha, xato bo‘ladi. Mundialni bu qadar ommalashishida nafaqat mundialni, balki futbolning milliardlar o‘yini bo‘lishida ham bu jamoaning o‘ziga xos ulushi bor. Shu ulush haqi men bu jamoaga 3-turning so‘nggi soniyalaragicha muxlislik qilaman. Agar Argentina guruh to‘sig‘idan o‘ta olsa, unda ular finalgacha bora oladilar. Chunki ularda Maradonna singari yetakchilardan qolgan g‘oliblik ruhi bor. Faqat buni namoyon eta olsalar bas!

Yahyoxo‘ja ULUG‘XO‘JAYEV