Rossiya yashil maydonlarida davom etayotgan Jahon chempionatida guruh bosqichining 2-turi yakuniga yetdi. Bugun esa 3-tur uchrashuvlariga start beriladi. Xabaringiz bor, guruhlarda so‘nggi tur o‘yinlari bir vaqtda boshlanadi.

Mundialda guruhlarda ochkolar teng kelib qolish ehtimoli mavjud. Shunday holatlarda qaysi ko‘rsatkichlar bo‘yicha o‘rinlar aniqlanishi musobaqa Reglamentida ko‘rsatib o‘tilgan.

Jamoalarning guruhdagi o‘rinlari quyidagi tamoyillar asosida aniqlanadi:

a) guruhda eng ko‘p ochko to‘plagan jamoa;

b) guruhning barcha o‘yinlarida eng yaxshi to‘plar farqiga ega bo‘lgan jamoa;

s) guruhning barcha o‘yinlarida ko‘p gol urgan jamoa.

- Agar ikki yoki undan ortiq jamoa mazkur 3 ta tamoyilga ko‘ra bir xil vaziyatda bo‘lsa, u holda ularning o‘rinlari quyidagicha aniqlanadi:

d) o‘zaro o‘yinlarda ko‘p ochko to‘plagan jamoa;

e) o‘zaro o‘yinlarda yaxshi to‘plar nisbatiga ega bo‘lgan jamoa;

f) o‘zaro o‘yinlarda ko‘p gol urgan jamoa;

g) Feyr-pley qoidasi. Bunda jamoalarning guruh bosqichidagi sariq va qizil kartochkalari hisob-kitob qilanadi va unda kamroq ochko olgan jamoa keyingi bosqichga yo‘l oladi. Bunda:

- sariq kartochka — 1 ochko;

- ikkita sariq kartochka orqali berilgan qizil kartochka — 3 ochko;

- to‘g‘ridan-to‘g‘ri qizil kartochka — 4 ochko;

- sariq va to‘g‘ridan-to‘g‘ri berilgan qizil kartochka — 5 ochko.

h) qur’a.