Россия яшил майдонларида давом этаётган Жаҳон чемпионатида гуруҳ босқичининг 2-тури якунига етди. Бугун эса 3-тур учрашувларига старт берилади. Хабарингиз бор, гуруҳларда сўнгги тур ўйинлари бир вақтда бошланади.

Мундиалда гуруҳларда очколар тенг келиб қолиш эҳтимоли мавжуд. Шундай ҳолатларда қайси кўрсаткичлар бўйича ўринлар аниқланиши мусобақа Регламентида кўрсатиб ўтилган.

Жамоаларнинг гуруҳдаги ўринлари қуйидаги тамойиллар асосида аниқланади:

а) гуруҳда энг кўп очко тўплаган жамоа;

b) гуруҳнинг барча ўйинларида энг яхши тўплар фарқига эга бўлган жамоа;

с) гуруҳнинг барча ўйинларида кўп гол урган жамоа.

- Агар икки ёки ундан ортиқ жамоа мазкур 3 та тамойилга кўра бир хил вазиятда бўлса, у ҳолда уларнинг ўринлари қуйидагича аниқланади:

d) ўзаро ўйинларда кўп очко тўплаган жамоа;

e) ўзаро ўйинларда яхши тўплар нисбатига эга бўлган жамоа;

f) ўзаро ўйинларда кўп гол урган жамоа;

g) Фейр-плей қоидаси. Бунда жамоаларнинг гуруҳ босқичидаги сариқ ва қизил карточкалари ҳисоб-китоб қиланади ва унда камроқ очко олган жамоа кейинги босқичга йўл олади. Бунда:

- сариқ карточка — 1 очко;

- иккита сариқ карточка орқали берилган қизил карточка — 3 очко;

- тўғридан-тўғри қизил карточка — 4 очко;

- сариқ ва тўғридан-тўғри берилган қизил карточка — 5 очко.

h) қуръа.