Pro-liga 17-turida «Xorazm» klubi safarda «Orol» bilan bellashdi.

Nukus shahrida o‘tgan Amudaryo derbisi har doimgidek keskin va murosasiz kurashlarga boy bo‘ldi, deb xabar beradi «Xorazm» klubi muxlislari telegram kanali.

Birinchi bo‘lim teng kurashlar ostida o‘tdi. «Xorazm» klubi xavfli vaziyatlarni ko‘proq yaratdi. Ammo nukusliklar darvozaboni va himoyachilari xatoga yo‘l qo‘yishmadi.

Ikkinchi bo‘limda o‘yin surati biroz oshdi. «Xorazm» qarshi hujumlarda samarali o‘ynab, raqib himoyachilarining xatolaridan unumli foydalanib qoldi.

62-daqiqada Kadamboy Nurmetov darvozabon bilan yuzma-yuz chiqib, to‘pni uning ustidan oshirib darvozaga kiritdi va hisobni ochdi. 68-daqiqada Muhammadqodir Rahimberganov burchak zarbasini qoyilmaqom tarzda amalga oshirib, to‘pni to‘g‘ri darvozaga yo‘llashga erishdi. Oradan 5 daqiqa o‘tgach Sardor Matmuratov darvozabon bilan yakkama-yakka qolgan vaziyatda uni dog‘da qoldirishga muvaffaq bo‘ldi. Qolgan daqiqalarda ham bir qancha xavfli vaziyatlar yuzaga kelgan bo‘lsa-da, darvozalarga boshqa to‘p kiritilmadi.

Qayd qilish joizki, shu kuni «Xorazm» klubini qo‘llab-quvvatlash uchun Nukus shahriga 40 nafardan ortiq xorazmlik muxlislar yetib borishdi. Ular o‘yindan so‘ng jamoa futbolchilarini olqishlar bilan kuzatib qolishdi.

Bu natijadan so‘ng, «Xorazm» musobaqa jadvalida 19 ochko bilan 5-o‘rinni egallab turibdi. «Orol» 9 ochko bilan so‘nggi o‘rinda bormoqda.

Pro-liga, 17-tur
25 iyun (dushanba)
Nukus, «Turon» stadioni
OROL (Nukus) - XORAZM (Urganch) - 0:3
Gollar: Qadamboy Nurmetov 62, Muhammadqodir Rahimberganov 68, Sardor Matmuratov 73