Про-лига 17-турида «Хоразм» клуби сафарда «Орол» билан беллашди.

Нукус шаҳрида ўтган Амударё дербиси ҳар доимгидек кескин ва муросасиз курашларга бой бўлди, деб хабар беради «Хоразм» клуби мухлислари телеграм канали.

Биринчи бўлим тенг курашлар остида ўтди. «Хоразм» клуби хавфли вазиятларни кўпроқ яратди. Аммо нукусликлар дарвозабони ва ҳимоячилари хатога йўл қўйишмади.

Иккинчи бўлимда ўйин сурати бироз ошди. «Хоразм» қарши ҳужумларда самарали ўйнаб, рақиб ҳимоячиларининг хатоларидан унумли фойдаланиб қолди.

62-дақиқада Кадамбой Нурметов дарвозабон билан юзма-юз чиқиб, тўпни унинг устидан ошириб дарвозага киритди ва ҳисобни очди. 68-дақиқада Муҳаммадқодир Раҳимберганов бурчак зарбасини қойилмақом тарзда амалга ошириб, тўпни тўғри дарвозага йўллашга эришди. Орадан 5 дақиқа ўтгач Сардор Матмуратов дарвозабон билан яккама-якка қолган вазиятда уни доғда қолдиришга муваффақ бўлди. Қолган дақиқаларда ҳам бир қанча хавфли вазиятлар юзага келган бўлса-да, дарвозаларга бошқа тўп киритилмади.

Қайд қилиш жоизки, шу куни «Хоразм» клубини қўллаб-қувватлаш учун Нукус шаҳрига 40 нафардан ортиқ хоразмлик мухлислар етиб боришди. Улар ўйиндан сўнг жамоа футболчиларини олқишлар билан кузатиб қолишди.

Бу натижадан сўнг, «Хоразм» мусобақа жадвалида 19 очко билан 5-ўринни эгаллаб турибди. «Орол» 9 очко билан сўнгги ўринда бормоқда.

Про-лига, 17-тур
25 июнь (душанба)
Нукус, «Турон» стадиони
ОРОЛ (Нукус) - ХОРАЗМ (Урганч) - 0:3
Голлар: Қадамбой Нурметов 62, Муҳаммадқодир Раҳимберганов 68, Сардор Матмуратов 73