Pro-liga 18-turida Urganchning «Xorazm» klubi o‘z maydonida G‘uzorning «Sho‘rtan» jamoasini qabul qildi.
O‘yin mezbonlarning to‘liq ustunligi ostida o‘tib, irodali, yirik hisobdagi g‘alabasi bilan tugadi.
Hisob 15-daqiqada mehmonlar tomonidan ochildi. Xavfli jarima zarbasidan so‘ng, Xolto‘rayev to‘pni darvozaga kiritishga erishdi. Biroq, g‘uzorliklarning quvonchi uzoqqa cho‘zilmadi. Oradan 2 daqiqa o‘tgach, Mirjalol Qurbonov uzoq masofadan juda chiroyli zarba yo‘llab, to‘pni darvozaning yuqori burchagiga kiritdi. Yana 2 daqiqadan so‘ng, Farruh Haydarov jarima maydoni chizig‘idan aniq zarba yo‘llab, darvozabonni dog‘da qoldirdi.
«Xorazm» klubining tezkor ikkita goli mehmonlarni esankiratib qo‘ydi. Natijada, ular o‘zlarini o‘nglay olmadilar. Bo‘lim oxirida esa Qadamboy Nurmetov yana ikkita gol urib, hisobni yirik ko‘rinishga keltirdi. 69-daqiqada, zaxiradan maydonga tushgan Sardor Matmuratov jarima maydonida himoyachilarni aldab o‘tib, jamoasining 5-to‘pini darvozaga yo‘lladi.
O‘yin davomida «Xorazm» klubini chiroyli tarzda qo‘llab-quvvatlab turgan muxlislar, bellashuv tugagach, futbolchilarni olqishlar bilan kuzatib qolishdi.
Bu natijadan so‘ng, «Xorazm» 22 ochko bilan 5-o‘rinni egallab turibdi. «Sho‘rtan» 11 ochko bilan 8-o‘rinda bormoqda.
Pro-Liga, 18-tur
29 iyun, Urganch, «Yoshlik» sport majmuasi, 925 tomoshabin
XORAZM (Urganch) - SHO‘RTAN (G‘uzor) 5:1 (4:1, 1:0)
Gollar: Mirjalol Qurbonov (17), Farruh Haydarov (20), Qadamboy Nurmetov (42, 45+1), Sardor Matmuratov (69) - Xolto‘rayev (15)
