Про-лига 18-турида Урганчнинг «Хоразм» клуби ўз майдонида Ғузорнинг «Шўртан» жамоасини қабул қилди.

Ўйин мезбонларнинг тўлиқ устунлиги остида ўтиб, иродали, йирик ҳисобдаги ғалабаси билан тугади.

Ҳисоб 15-дақиқада меҳмонлар томонидан очилди. Хавфли жарима зарбасидан сўнг, Холтўраев тўпни дарвозага киритишга эришди. Бироқ, ғузорликларнинг қувончи узоққа чўзилмади. Орадан 2 дақиқа ўтгач, Миржалол Қурбонов узоқ масофадан жуда чиройли зарба йўллаб, тўпни дарвозанинг юқори бурчагига киритди. Яна 2 дақиқадан сўнг, Фарруҳ Ҳайдаров жарима майдони чизиғидан аниқ зарба йўллаб, дарвозабонни доғда қолдирди.

«Хоразм» клубининг тезкор иккита голи меҳмонларни эсанкиратиб қўйди. Натижада, улар ўзларини ўнглай олмадилар. Бўлим охирида эса Қадамбой Нурметов яна иккита гол уриб, ҳисобни йирик кўринишга келтирди. 69-дақиқада, захирадан майдонга тушган Сардор Матмуратов жарима майдонида ҳимоячиларни алдаб ўтиб, жамоасининг 5-тўпини дарвозага йўллади.

Ўйин давомида «Хоразм» клубини чиройли тарзда қўллаб-қувватлаб турган мухлислар, беллашув тугагач, футболчиларни олқишлар билан кузатиб қолишди.

Бу натижадан сўнг, «Хоразм» 22 очко билан 5-ўринни эгаллаб турибди. «Шўртан» 11 очко билан 8-ўринда бормоқда.

Про-Лига, 18-тур
29 июнь, Урганч, «Ёшлик» спорт мажмуаси, 925 томошабин
ХОРАЗМ (Урганч) - ШЎРТАН (Ғузор) 5:1 (4:1, 1:0)
Голлар: Миржалол Қурбонов (17), Фарруҳ Ҳайдаров (20), Қадамбой Нурметов (42, 45+1), Сардор Матмуратов (69) - Холтўраев (15)