Bolgariya poytaxti Sofiya shahrida suzish bo‘yicha xalqaro musobaqa bo‘lib o‘tmoqda. Turnirning ahamiyatli tomoni shundaki, u oktyabr oyida bo‘lib o‘tadigan III yozgi o‘smirlar Olimpiya o‘yinlariga yo‘llanma uchun reyting ochkolari taqdim etuvchi musobaqa hisoblanadi.
Musobaqada O‘zbekiston, Buyuk Britaniya, Rossiya, Xorvatiya, Litva, Germaniya, Bolgariya kabi mamlakatlardan 370 dan ortiq sportchi ishtirok etmoqda.
Bahslarning ilk kunida hamyurtlarimizdan Aleksey Sidorchuk 50 metr brass usulida suzish bahslarida 3-o‘rin, Ahmadjon Umurov 100 metr erkin usulda 2-o‘rin sohibi bo‘ldi. Qizlarimizdan esa Yulduz Qo‘chqorova 100 metrga chalqancha usulda suzishda 2-o‘rin, 50 metrga chalqancha suzishda esa 3-o‘rinni qo‘lga kiritdi. Natalya Kritinina erkin usulda 50 metr masofaga suzish bahslarida 3-pog‘onadan joy oldi.
Bellashuvlar davom etmoqda. Ushbu reyting musobaqalari yakuniga yetgach, Xalqaro suzish federasiyasi (FINA) 3 avgust kuni yo‘llanma egalari ro‘yxatini ma’lum qiladi.
