O‘zbekiston Respublikasi Prezidentining PQ-3610-sonli “Futbolni yanada rivojlantirish chora-tadbirlari to‘g‘risida”gi qaroriga asosan tashkil qilingan hududiy bolalar va o‘smirlar futbol akademiyalariga qabulning birinchi bosqichi 1 iyul kuni boshlangani xaqida avval xabar berib o‘tgan edik.
20 iyul kuniga qadar davom etadigan ushbu sinov imtixonlarida bugunga qadar minglab iqtidorli bolalar ishtirok etishmoqda. Eslatib o‘tamiz, har bir hudud, ya’ni viloyat aholisi faqatgina o‘zining viloyatidagi hududiy akademiyaga xujjat topshirishi mumkin. Birinchi bosqich imtihonlarida qatnashishni istagan bolalar o‘zlari bilan tug‘ilganlik haqida guvohnoma hamda sog‘lig‘i to‘g‘risida ma’lumotnoma (086 forma) olib kelishlari kerak bo‘ladi.
1-bosqichda sinovlari faqatgina futbol o‘yinidan iborat bo‘lib, bolalar jamoalarga bo‘lingan holatda futbol o‘ynashadi. Boshqa hech qanday maxsus talablar mavjud emas. Futbolchilar bevosita o‘yin davomida o‘z iqtidorlarini namoyish qilishadi. Murabbiylar tomonidan tanlab olingan iqtidori bor bolalar, 2-bosqichda ishtirok etishlari mumkin bo‘ladi.
Hududiy bolalar va o‘smirlar futbol akademiyalariga qabulning birinchi bosqichi barcha viloyatlar bo‘ylab davom etmoqda.
Quyida Andijon hududiy bolalar va o‘smirlar futbol akademiyasiga qabul jarayonidan oligan suratlar e’tiboringizga havola qilinadi.
