“Nasaf” – “AGMK” uchrashuvidan so‘ng mezbonlar ustozi Ro‘ziqul Berdiyev quyidagicha fikr bildirdi:
- Bugun omad ko‘proq “AGMK” jamoasiga kulib boqdi. Birinchi bo‘limda ko‘proq vaziyatlar yarata oldik, agar bu vaziyatlarni golga aylantira olganimizda natija boshqacharoq bo‘lishi ham mumkin edi. Mag‘lubiyatni tan olishimiz kerak. Aslida, omad ham kuchlilarga kulib boqadi. Bugun aksiga olib tajribali o‘yinchilarimiz qo‘pol xatolarga yo‘l qo‘yishdi.
Bunday xatolarni raqib kechirmaydi, albatta. Agar raqibimizning bugungi kiritgan gollariga e’tibor qaratsak, ular oson gollar urishdi. Menimcha, raqib o‘yinchilari bunday xatolarimizni kutmagan ham bo‘lishsa kerak.
Ikkinchi bo‘limdagi gollardan so‘ng, maydonga tushgan yosh o‘yinchilarimizning ruhiyatiga ham salbiy ta’sir ko‘rsatdi. Xullas, bugun o‘z xatolarimiz tufayli mag‘lubiyatga uchradik. So‘zimni oxirida, har qanday holatda ham bizni qo‘llab-quvvatlab turgan sodiq muxlislarimizga alohida minnatdorchiligimni bildiraman. Rahmat sizlarga!, - dedi mutaxassis.
