18 iyul kuni Ukraina klublari legioner futbolchilari uchun tashkil etilgan to‘purarlar klubi sakkiz yoshga to‘ldi. Uning asoschisi O‘zbekiston terma jamoasining sobiq hujumchisi Maksim Shaskix hisoblanadi.
Aynan u Ukraina chempionatida xorijlik futbolchilar orasida birinchi bo‘lib 100ta gol urgandi. Maxsus muxbirimiz Viktor Xoxlyuk Shaskixning faoliyati haqida so‘z yuritadi.
Maksim Kaliningradning «Baltika» jamoasida to‘purarlik qobiliyatini namoyish qilgandi. Natijada yosh futbolchiga Kiyevning «Dinamo» jamoasi skautlari e’tibor qaratishdi. O‘sha paytda kiyevliklar «Milan»ga o‘tib ketgan Andrey Shevchenkoga o‘rinbosar qidirish bilan band edilar.
Xullas, 1999 yilning 24 iyul kuni Maksim Shaskix Ukraina chempionatining 3-turidan o‘rin olgan «Karpati»ga qarshi o‘yinda (3:0) debyutini nishonladi. O‘shanda u tajribali himoyachi Vladimir Yezerskiyning o‘rniga maydonga tushirilgandi.
Oradan to‘rt kun o‘tib, YECHL kvalifikasion raundidan o‘rin olgan «Jalgiris»ga qarshi uchrashuvda u «dubl» muallifiga aylandi. O‘sha bahsda «Dinamo» 2:0 hisobida zafar quchgandi. Aynan shu o‘yinda u kiyevliklar safidagi gollari hisobini ochgandi.
«Dinamo»dagi debyut mavsumida Maksim 44 o‘yinda 29ta gol urishga erishdi. Ukraina chempionatida esa 25ta uchrashuvda maydonga tushib, 20ta to‘p kiritgan. Shu tariqa u chempionat to‘purari bo‘ldi. 2002-2003 yillar mavsumida ham Shaskix Ukraina chempionati to‘purariga aylangan. Bu safar 29 o‘yinda 22ta gol urgandi.
«Dinamo»dagi 10 mavsum o‘zbekistonlik futbolchining faoliyatidagi eng muvaffaqiyatlisi bo‘ldi. Kiyevliklar safida u olti marta (2000, 2001, 2003, 2004, 2007, 2009) mamlakat chempionligini nishonladi.
5 bor (2000, 2003, 2005, 2006, 2007) Ukraina kubogi va ikki marta (2004, 2006) Ukraina Superkubogi sohibiga aylandi. Aynan «Dinamo»da Maksim Yevropa darajasidagi yulduzga aylandi.
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
