Pepsi Superliga 21-turi doirasida Namanganning “Navbahor” klubi o‘z maydonida Buxoroning “Buxoro” jamoasini qabul qiladi. Mazkur o‘yin uchun chiqarilgan chiptalar bugundan sotuvga chiqdi.  

“Navbahor” ishqibozlari 4,5, 6, 7, 8,9, 14, 15, 16, 17, 18 va 19-sektorlar uchun 15 ming,  2,3, 10, 11, 12, 13, 20 hamda 21-sektorlar uchun 20 ming so‘mdan chipta xarid qilishlari mumkin.

Bundan tashqari, “Navbahor” – “Buxoro” uchrashuvi uchun chiqarilgan 20 ming so‘mlik chiptalar yutuqli hisoblanib, muxlislar xarid qilgan chiptalariga 10 dona soyabon, 10ta “Navbahor” jamoasi futbolchilarining imzolari tushirilgan to‘plar va 10 dona shlyapa   yutib olish imkoniyatini qo‘lga kiritishadi.

Demak, ishqibozlar xarid qilgan chiptalariga sevimli jamoalari ishtirokidagi o‘yinni tomosha qilishdan tashqari, o‘z uylariga sovg‘alar bilan qaytish imkoniyatiga ham ega bo‘lishadi. Eslatib o‘tamiz, 15 ming so‘mlik chiptalarga yutuq qo‘yilmagan. 

Shuningdek, “Navbahor” – “Buxoro” uchrashuvidan oldin Namanganning taniqli xonandalari tomoshabinlarga o‘zlarining dilrabo kuy-qo‘shiqlari bilan zavq ulashishadi.

Chiptalar bugundan boshlab, Namangan shahridagi “Markaziy” o‘yingoh, “Chorsu” dahasi, “Sardoba” va sanoat hududida joylashgan ixtisoslashtirilgan qurilish mollari (SHamshiboy bozori) bozorlari, shuningdek, “Isparxon” Supermarketi hududlarida sotilmoqda. Chiptalar miqdori cheklangan. Ularni tezroq xarid qilishga shoshiling!

“Navbahor” – “Buxoro” jamoalari o‘rtasidagi uchrashuvlar doimo qiziqarli va hujumkor ruhda kechgan. “Navbahor” – “Buxoro” uchrashuvi 12 avgust kuni soat 20:30da start oladi.  

“Navbahor” PFK matbuot xizmati.