Pepsi Суперлига 21-тури доирасида Наманганнинг “Навбаҳор” клуби ўз майдонида Бухоронинг “Бухоро” жамоасини қабул қилади. Мазкур ўйин учун чиқарилган чипталар бугундан сотувга чиқди.  

“Навбаҳор” ишқибозлари 4,5, 6, 7, 8,9, 14, 15, 16, 17, 18 ва 19-секторлар учун 15 минг,  2,3, 10, 11, 12, 13, 20 ҳамда 21-секторлар учун 20 минг сўмдан чипта харид қилишлари мумкин.

Бундан ташқари, “Навбаҳор” – “Бухоро” учрашуви учун чиқарилган 20 минг сўмлик чипталар ютуқли ҳисобланиб, мухлислар харид қилган чипталарига 10 дона соябон, 10та “Навбаҳор” жамоаси футболчиларининг имзолари туширилган тўплар ва 10 дона шляпа   ютиб олиш имкониятини қўлга киритишади.

Демак, ишқибозлар харид қилган чипталарига севимли жамоалари иштирокидаги ўйинни томоша қилишдан ташқари, ўз уйларига совғалар билан қайтиш имкониятига ҳам эга бўлишади. Эслатиб ўтамиз, 15 минг сўмлик чипталарга ютуқ қўйилмаган. 

Шунингдек, “Навбаҳор” – “Бухоро” учрашувидан олдин Наманганнинг таниқли хонандалари томошабинларга ўзларининг дилрабо куй-қўшиқлари билан завқ улашишади.

Чипталар бугундан бошлаб, Наманган шаҳридаги “Марказий” ўйингоҳ, “Чорсу” даҳаси, “Сардоба” ва саноат ҳудудида жойлашган ихтисослаштирилган қурилиш моллари (Шамшибой бозори) бозорлари, шунингдек, “Испархон” Супермаркети ҳудудларида сотилмоқда. Чипталар миқдори чекланган. Уларни тезроқ харид қилишга шошилинг!

“Навбаҳор” – “Бухоро” жамоалари ўртасидаги учрашувлар доимо қизиқарли ва ҳужумкор руҳда кечган. “Навбаҳор” – “Бухоро” учрашуви 12 август куни соат 20:30да старт олади.  

“Навбаҳор” ПФК матбуот хизмати.