"Барселона" "Реал" томонидан каталониялик клубнинг Ҳакамлар техник қўмитаси собиқ вице-президенти Хосе Мария Энрикес Негрейра билан алоқаларига доир ҳужжатлар УЕФАга тақдим этилгани ҳақидаги хабарлардан сўнг баёнот берди.
"УЕФА "Барселона"га қарши янги интизомий иш очмади. Ушбу ишлар 2023 йилда икки нафар терговчи тайинланиши билан бошланган. Улар қайта очилгани йўқ, чунки ҳеч қачон ёпилмаган эди", — дейилади клуб расмий сайтидаги баёнотда.
Шунингдек, хабарда мазкур жараён Испаниядаги жиноий иш билан боғлиқ экани таъкидланган. "Барселона" тергов бошланганидан буён клуб УЕФА лицензияларини ҳеч қандай эътирозларсиз олишда ва ташкилот тасарруфидаги мусобақаларда иштирок этишда давом этаётганини ҳам қайд этди.
Эслатиб ўтамиз, 2023 йилда "Барселона"га Испания Қироллик футбол федерациясида ишлаган Негрейрага амалга оширилган тўловлар билан боғлиқ порахўрлик айблови қўйилган эди.
Клуб 2001 йилдан 2018 йилгача бўлган даврда Негрейрага 8 миллион евродан ортиқ маблағ тўлаганликда айбланган.
