“Aurum 898” klubi faoliyati to‘xtatildi. Bu haqda “Qalampir.uz” muxbiri klubga borib, ma’lumot to‘pladi. Ayni damda klub binosida huquq-tartibot organlari xodimlari tomonidan ish olib borilmoqda. Voqea joyidan yo‘llangan fotosuratlar va ma’lumotlarga qaraganda, klub peshtoqidan diskotekaning nomi olib tashlangan, reklama bannerlar axlatga otilgan.
“Qalampir.uz” manbasining ma’lum qilishicha, klub faoliyati to‘xtatilib, binoda ta’mirlash ishlari olib boriladi. Bu yerda yo bouling o‘yingohi, yo sport sog‘lomlashtirish markazi ochilishi ko‘zda tutilgan.
Bugun, 13 avgust kuni Toshkentdagi boshqa ishratxonalar – tungi klub va barlarda ham reyd o‘tkazilishi rejalashtirilgan. Huquq-tartibot organlariga kelib tushayotgan murojaatlar asosida ularning ko‘pchiligi faoliyati tugatiladi.
Jamshid Kenjayevga kelsak, yangi aniqlangan ma’lumotlarga ko‘ra, u bilan bog‘liq janjalli holat birinchi bor qayd etilmagan. Marhum bundan avval ham qonli voqealarda ishtirokchi bo‘lgani aytilmoqda. Ichki ishlar xodimlari tomonidan ma’lum qilinishicha, yigit shu kuni bir emas, ikki pichoq bilan klubga kirishga uringan va qo‘riqchilardan biriga tarsaki tushirgach, janjal chiqqan.
Xabaringiz bor, bu voqea Yunusobod tumanida sodir bo‘lgandi. Ayni damda, Abdulla Qodiriy ko‘chasiga ikkita 24 soat faoliyat yuritayotgan qo‘riqlash xizmati butkasi o‘rnatilgan.
Jamshid Kenjayevning vahshiylarcha o‘ldirilishi tasvirlangan video tarqaldi