Arsen Venger hamda Antonio Konte Angliya Premyer-ligasini tark etishganiga qaramay, yangi mavsumda ham murabbiylar o‘rtasida ajoyib duellar guvohiga aylanishimiz tayin.
Gap aynan qaysi mutaxassislar haqida borayotganini bilishni istasangiz, quyidagi maqola bilan tanishishni maslahat beramiz.
Xosep Gvardiola («Manchester Siti»)
Bu murabbiy amaldagi chempion, faoliyati davomida Ispaniya, Germaniya hamda Angliya chempionatlarida g‘olib chiqqan. Ikki marta Chempionlar Ligasida zafar quchgan, ammo «shalpangquloq»ning har ikkisini ham «Barselona» ustozi sifatida qo‘lga kiritgan.
Gvardiolaning bugungi kundagi asosiy maqsadi - «Manchester Siti»ni Yevropaning eng kuchli jamoasiga aylantirish.
Joze Mourinyo («Manchester Yunayted»)
Bir yil avval Yevropa Ligasi chempionligida muvaffaqiyat qozondi. O‘tgan mavsumni «MYU» sovrinlarsiz yakunlagan bo‘lsada, APLda ikkinchi o‘rinni qo‘lga kiritdi. «Qizil iblislar»ni Angliya chempionligi uchun kurashishdi deyish qiyin: bu yerda «Siti» o‘zi bilan o‘zi kurashdi, desak to‘g‘riroq bo‘ladi.
Yangi mavsumda «Manchester Yunayted» sovrinlardan tashqari, YECHLdagi avvalgi nufuzini qaytarish uchun ham kurashadi.
Maurisio Pochettino («Tottenxem»)
Garchi «Tottenxem» o‘ziga yarasha ustunliklarga ega bo‘lsada, hamon sovrinlarsiz qolib ketayotgani kishini ranjitadi. Boshqa tomondan, bu jamoani yutuqlarga erishmaganlikda ayblash ham noto‘g‘ri. Axir «shporlar» Pochettino boshchiligida APLda katta kuchga aylanishdi, raqobatchi qo‘shnilari «Arsenal»dan yuqoriroq o‘rinlarni egallashni o‘rganishdi.
Yurgen Klopp («Liverpul»)
Ikki oy avval Klopp yevrokuboklardagi jami uchinchi, shu jumladan, YECHLdagi ikkinchi finalni boy bergandi. Ammo Yurgen yangi urinishlarga tayyorlanmoqda. «Liverpul» yetakchi futbolchilarni saqlab qolishdan tashqari, tarkibni sezilarli tarzda kuchaytirdi.
Eng muhimi, saviyali darvozabon sotib oldi. Xullas, bukmekerlar «qizillar»ni «Manchester Siti»dan so‘ng APL-2018|2019da asosiy favorit sifatida ko‘rishayotgani bejiz emas, albatta.
Maurisio Sarri («Chelsi»)
«Aristokratlar» bir italiyalik mutaxassisni boshqasiga almashtirishdi. «Napoli»ning sobiq bosh murabbiyidagi falsafa yangi mavsumda biz mutlaqo boshqa «Chelsi»ni ko‘rishimizga ishoradek, go‘yo.
Jamoada hujumkorlik, to‘pga egalik qilish, taktik jihatdan mukammal o‘yin shakllansa, bundan ko‘pchilik xursand bo‘lishi tabiiy.
Unai Emeri («Arsenal»)
APLdagi «katta oltilik» murabbiylari orasida faqat birgina pragmatik mutaxassis qoldi - Joze Mourinyo. Qolganlarni esa hech ikkilanmay romantiklar safiga qo‘shish mumkin, ular orasida Emeri ham bor.
Arsen Vengerning 22 yillik faoliyatidan so‘ng «Arsenal»ni Unai qabul qilib oldi va Yevropa Ligasining uch karra g‘olibini jiddiy sinovlar kutib turibdi. Boz ustiga, Ispaniya chempionati orqali yaxshi tanish bo‘lgan Mourinyo va Gvardiolaga yana raqobat tug‘dirishiga to‘g‘ri keladi.
Shon Daych («Bernli»)
Avvalgi chempionatda Daych boshchiligidagi «Bernli» kuchli oltilikdan keyingi o‘rinni egallab, yuqori natija qayd etdi. Yangi mavsumda ham Shon va uning shogirdlaridan bu ko‘rsatkich tasodif emasligini isbotlash talab etiladi.
Marku Silva («Everton»)
Bu portugaliyalik mutaxassis uchun Angliyadagi uchinchi klub hisoblanadi. Avvalgi ish joyi - «Uotford»dan yanvarda iste’foga chiqqandi. O‘shanda «qovog‘arilar»ning natijalari yomonlashgan, klub rahbariyati esa Silvaning «Everton» bilan aloqaga chiqqanidan xabar topgandi.
Shuningdek, Marku «Chelsi»ning vaqtinchalik bosh murabbiyi bo‘lishi haqida ham ma’lumotlar tarqalgandi, ammo u mavsum yakunini kutib, nihoyat, «Gudison Park»ka keldi. «Everton»ning bugungi kundagi tarkibi yomonmas, Silva esa ushbu futbolchilar bilan yaxshi natijalarga erisha oladigan mutaxassis.
Manuel Pellegrini («Vest Xem»)
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
