Xabaringiz bor, Indoneziyada XVIII Osiyo o‘yinlari davom etmoqda. Bugun, mazkur o‘yinlar doirasida O‘zbekiston terma jamoasi futbolchilari Janubiy Koreya terma jamoasiga qarshi maydonga tushishdi va yakunda 3:4 hisobida imkoniyatni boy berib qo‘yishdi.
Uchrashuv oldidan mazkur bahs finalga qiyoslangandi va o‘yin davomida bu taxminlar o‘zini to‘laligicha oqladi. O‘zbekistonlik futbolchilar hisobda ikki marotaba ortda qola turib, muvozanatni tiklashga muvaffaq bo‘lishdi. Hattoki hisobda ham oldinga chiqib olishdi.
O‘yin shu darajada keskin tus oldiki, uchrashuv davomida futbol bilan bog‘liq har qanday holatga guvoh bo‘ldik. Gollar shousi, avtogol, qizil kartochka va penalti ham bo‘ldi bahs davomida. Umuman, ana shu jihatdan olib qaraydigan bo‘lsak, o‘yin chorak finalning bezagiga aylandi. Janubiy Koreya terma jamoasi bugun Osiyo o‘yinlarining amaldagi chempioni sifatida maydonga tushdi. Jamoa tarkibida jahonning eng kuchli chempionatlaridan biri hisoblangan Angliya Premyer Ligasining «Tottenxem» klubida to‘p suruvchi Son Xyon Min o‘yinni qo‘lga oldi va muhim vaziyatlarda jamoadoshlarini o‘z ortidan ergashtira oldi.
Afsuski, Ikrom Aliboyevning maydondan chetlashtirilishi bosh murabbiy Ravshan Haydarovning rejalarini o‘zgartirib yubordi va yigitlarimiz qo‘shimcha bo‘limlarni bir kishi kam bo‘lib o‘tkazishga majbur bo‘lishdi. Ekstra taymlar ham ko‘rsatib berdiki, har ikki jamoa ham holdan toygan, barcha penaltilar seriyasini kutayotgandi go‘yo. Ammo, kutilmaganda o‘yin yakunlanishiga uch daqiqa qolganida hakam darvozamiz tomon penalti belgiladi. Koreyalik futbolchilar esa ushbu imkoniyatni qo‘ldan chiqarishmadi. Aynan penaltidan kiritilgan gol sabab Janubiy Koreya terma jamoasi yarim finalga yo‘l oldi.
Shu o‘rinda futbolchilarga aytar so‘zimiz bor:
«Sizlar qo‘ldan kelgancha harakat qildingiz. Buni barcha ko‘rdi! Maydonda boringizni berib o‘ynadingiz va biz buni qadrlaymiz. Albatta, biz sizni final o‘yininda ko‘rishni juda-juda istagandik. Ammo, bu futbol. Unda g‘alaba va mag‘lubiyat yonma-yon yuradi. Shunday ekan, kayfiyatni tushirmang yigitlar! Hayot davom etadi!».
