O‘zbekiston - Suriya o‘rtoqlik uchrashuvi oldidan o‘tkazilgan matbuot anjumanining ikkinchi qismida Suriya terma jamoasi bosh murabbiyi Bernd Shtange futbolchi Umar al Soma bilan anjumanga tashrif buyurdi.
"O‘zbekiston bilan o‘yin Suriyaning navbatdagi rasmiy o‘yinlariga ya’ni FIFA va OFK tomonidan tashkil etiladigan musobaqalar uchun tayyorgarlik vazifasini o‘taydi va bu o‘yin biz uchun juda ham muhim.
Biz O‘zbekiston bilan o‘yinga asosan legionerlarni taklif etdik.
Biz kecha to‘liq tarkibda yig‘ilishga ulgurdik va dastlabki mashg‘ulotni Paxtakor stadionida o‘tkazdik.
O‘zbekistonda futbolni rivojlantirish uchun keng ko‘lamdagi ishlar amalga oshirilayotganini o‘z ko‘zim bilan ko‘rdim va bu hali jahon miqyosida o‘z mevasini berishi aniq.
Oldingi davrdanoq o‘zbek futboli rivojiga tamal toshi to‘g‘ri qo‘yilgan va rivojlanish strategiyasi ham to‘g‘ri yo‘lda deb hisoblayman. Bunga Paxtakor jamoasining tarixi ham yaqqol misol bo‘la oladi", - deydi Shtange.
