Bilasiz, O‘zbekiston Professional futbol ligasi mavsum boshidan buyon har oyning eng yaxshilarini aniqlab kelmoqda.

Mazkur so‘rovnomada Pepsi  Superliganing 12 ta klubi bosh murabbiylari va sardorlari ishtirok etdi. Muxlislar ovozi esa PFL rasmiy saytida o‘tkazilgan so‘rovnoma orqali qabul qilindi.

Ortda qolgan avgust oyida 3 ta tur uchrashuvlari bo‘lib o‘tdi. O‘tkazilgan 20-21-22-turlar davomida bir qator jamoalar muxlislarga yoqadigan o‘yin namoyish etishdi.

Oyning eng yaxshilarini aniqlash uchun o‘tkazilgan so‘rovnomada “Neftchi” jamoasi bosh murabbiyi Bahrom Xaydarov g‘oliblikni qo‘lga kiritdi. Mavsumni u qadar muvaffaqiyatli boshlay olmagan Bahrom Xaydarov ustozligidagi farg‘onaliklar avgust oyini juda ko‘tarinki ruhda o‘tkazishdi va yakunda 2 g‘alaba va 1 durang qayd etishdi. Jamoa avgustda umuman mag‘lub bo‘lmadi. Natijada so‘rovnomada eng ko‘p ovoz olgan murabbiy yakunda 43 ochko jamg‘ardi. 

Ikkinchi pog‘onadan 3 uchrashuvda 2 g‘alaba va 1 mag‘lubiyat qayd etgan AGMK ustozi Baxtiyor Ashurmatov o‘rin oldi. Uchinchi o‘rin esa “Lokomotiv” bosh murabbiyi vazifasini bajaruvchi Andrey Fyodorovga nasib etdi.