O‘zbekiston hamda Eron o‘rtasida kechgan o‘rtoqlik uchrashuvida hamyurtlarimiz mag‘lubiyatga uchrashdi.

Uchrashuvning birinchi bo‘limida terma jamoamiz eronliklarga qarshi munosib tarzda o‘ynashdi.

Biz bir-nechta hujumlarni amalga oshirdik biroq, barchasi samarasiz tarzda yakunlandi. Birinchi bo‘limni nisbatan yaxshi o‘tkazdik. Biroq ikkinchi bo‘limda futbolchilarimiz charchab qolganliklari yaqqol ko‘rinib qoldi.

Ikkinchi bo‘limda Kuper ko‘plab yangi futbolchilarni maydonga tushurdi. Ammo, bu futbolchilar o‘yinga unchalik yaxshi kirishib ketolmadi.

Bu ayniqsa Marat Bikmayev o‘rniga maydonga tushgan Igor Sergeevda ko‘rindi. Ikkinchi bo‘limda raqib bizni hujumlar bo‘roni bilan siyladi desak mubolag‘a bo‘lmaydi. Shu hujumlardan so‘ng Mahdiy Turobiy 67-daqiqada o‘yindagi yagona golni urishga muvaffaq bo‘ldi.

Shundan so‘ng, ham terma jamoamiz ketma-ket xatolarga yo‘l qo‘yishni va himoyaga yotib olishni to‘xtatmadi.

Biz goldan so‘ng ruhan sinib qoldik. Ammo, o‘yin so‘nggida bir-ikkita xavfli vaziyatlarni yuzaga keltirdik. Biroq, afsuski muvozanatni tenglatira olmadik. Shunday tarzda, Ektor Kuper qo‘l ostidagi O‘zbekiston ilk mag‘lubiyatni qarshilab oldi.

 11 sentyabr, Toshkent. "Milliy" stadioni

O‘zbekiston - Eron - 0:1 

Gol: Mahdiy Turobiy (67)

O‘zbekiston: Eldorbek Suyunov, Vitaliy Denisov (Vladimir Kozak, 72), Anzur Ismoilov, Islom To‘xtaxo‘jayev, Farrux Sayfiyev, Odil Ahmedov, Otabek Shukurov, Eldor Shomurodov (Sanjar Tursunov, 46), Marat Bikmayev (Husniddin G‘ofurov, 46), Sardor Rashidov (Sardor Sobirxo‘jayev, 56), Temurxo‘ja Abduxoliqov (Igor Sergeev, 46)

Eron: Amir Obidzoda, Murtazo Puraliganjiy, Majid Husayniy (Pejman Muntaziriy, 62), Vuriya G‘ofuriy (Sodiq Muharramiy, 46), Milod Muhammadiy, Said Izzatullohiy (Mas’ud Shojaiy, 69), Umid Ibrohimiy, Ashkon Dejog‘a (Somon Quddus, 46), Ali Qulizoda, Alirizo Jahonbaxsh (Mahdiy Turobiy, 46), Karim Ansorifard (Mahdiy Turobiy, 64).