Xabar berib o‘tganimizdek, Milliy olimpiya qo‘mitasi bir necha sport turida seleksion musobaqalarni o‘tkazmoqda. Bungacha taekvondo WTF bo‘yicha bahslar yakuniga yetib, unda g‘olib va sovrindorlar nomi aniq bo‘lib ulgurdi.

Shu kunlarda, poytaxtimizdagi «Universal» sport saroyida mazkur turnirda boks bo‘yicha bellashuvlar o‘tkazilmoqda. Bahslarda kikboks, muaytay, qo‘l jangi bilan shug‘ullanayotgan sportchilar boks bo‘yicha sovrinli o‘rinlar uchun kurash olib borishmoqda.

Bundan ko‘zlangan maqsad yuqorida qayd etilgan sport turlari vakillariga olimpiya sport turi hisoblangan boks bilan shug‘ullanish va kelajakda Olimpiya o‘yinlarida yurtimiz bayrog‘ini ko‘klarga ko‘tarish uchun imkoniyat yaratib berishdir. Bahslar 8 vazn toifasida tashkil etilmoqda.

Bugun musobaqada saralash bahslari uchrashuvlari yakuniga yetdi. Ertaga yarim final bellashuvlari o‘tkaziladi. 1 oktyabr kuni esa finallar bo‘lib o‘tadi.

Eslatib o‘tamiz, musobaqa yakunida birinchi o‘rin sohiblarining har biriga Milliy olimpiya qo‘mitasi tomonidan 5 million so‘m miqdoridagi pul mukofoti taqdim etiladi. Ikkinchi va uchinchi o‘rin egalari esa mos ravishda 1 million so‘m va 500 000 so‘m pul mukofoti bilan taqdirlanadi.