“Dinamo” – “Andijon” (0:0) uchrashuvidan keyin dastlab mezbonlar bosh murabbiyi Davron Fayziyev o‘yin borasidagi savollarga javob qaytardi.

- O‘yin borasida to‘xtaladigan bo‘lsam, fikrimcha durang ikki tomon uchun ham adolatli natija bo‘ldi. Sababi, bunday bahslarda bitta gol o‘yin taqdirini hal etadi. Biz ham, raqiblarimiz ham o‘yin yakunigacha o‘sha golni urishga intildik, ammo g‘alabani ilib ketish ikki tomonga ham nasib qilmadi.

Negadir uyimizdagi o‘yinlarni jamoamiz juda qiyin o‘tkazmoqda. Bunga eng avvalo bosh murabbiy sifatida mening aybim bor. Buni yana tahlil qilamiz. Bugun “Andijon” jamoasi ham bejizga peshqadam emasligini ko‘rsatdi.

O‘yin kurashlarga boy o‘tgan bo‘lsada, gollar yo‘qligi o‘yinni bezamadi. Biz har qanday holatda ham maqsad sari kurashishda davom etamiz. Oldinda bizni “Andijon”ga qarshi safar o‘yini kutib turibdi. Bahs og‘ir o‘tishi aniq. Har qanday holatda ham biz faqat g‘alaba uchun kurashamiz.

Oldinda to‘liq 4-davra o‘yinlari kutib turibdi. Jadvaldagi kuchli beshlikdagi barcha jamoada imkoniyat bor. Hal qiluvchi turlarda hech kimga oson bo‘lmaydi.