“Динамо” – “Андижон” (0:0) учрашувидан кейин дастлаб мезбонлар бош мураббийи Даврон Файзиев ўйин борасидаги саволларга жавоб қайтарди.

- Ўйин борасида тўхталадиган бўлсам, фикримча дуранг икки томон учун ҳам адолатли натижа бўлди. Сабаби, бундай баҳсларда битта гол ўйин тақдирини ҳал этади. Биз ҳам, рақибларимиз ҳам ўйин якунигача ўша голни уришга интилдик, аммо ғалабани илиб кетиш икки томонга ҳам насиб қилмади.

Негадир уйимиздаги ўйинларни жамоамиз жуда қийин ўтказмоқда. Бунга энг аввало бош мураббий сифатида менинг айбим бор. Буни яна таҳлил қиламиз. Бугун “Андижон” жамоаси ҳам бежизга пешқадам эмаслигини кўрсатди.

Ўйин курашларга бой ўтган бўлсада, голлар йўқлиги ўйинни безамади. Биз ҳар қандай ҳолатда ҳам мақсад сари курашишда давом этамиз. Олдинда бизни “Андижон”га қарши сафар ўйини кутиб турибди. Баҳс оғир ўтиши аниқ. Ҳар қандай ҳолатда ҳам биз фақат ғалаба учун курашамиз.

Олдинда тўлиқ 4-давра ўйинлари кутиб турибди. Жадвалдаги кучли бешликдаги барча жамоада имконият бор. Ҳал қилувчи турларда ҳеч кимга осон бўлмайди.