Bugun, 5 oktyabr kuni poytaxtimizdagi “Milliy” stadionining anjumanlar zalida O‘zbekiston kamondan otish federasiyasining navbatdan tashqari hisobot-saylov konferensiyasi bo‘lib o‘tdi. Unda O‘zbekiston Milliy olimpiya qo‘mitasi mutasaddilari, kamondan otish federasiyasi xodimlari, viloyatning federasiya bo‘limi vakillari, sportchi va murabbiylar, shuningdek, ommaviy axborot vositasi xodimlari ishtirok etishdi.
Yig‘ilishni O‘zbekiston Milliy olimpiya qo‘mitasi Prezidenti maslahatchisi Komiljon Xudoyberganov olib bordi. Konferensiya davomida bungacha erishilgan yutuqlar, qo‘lga kiritilgan muvaffaqiyatlar uchun federasiyaning avvalgi raisi Jamoliddin Boboxonovning xizmatlari alohida qayd etildi va minnatdorchilik ramzi sifatida unga zarbop cho‘pon kiydirildi.
Shundan so‘ng Otabek Sobitjonovich Imomov nomzodi O‘zbekiston kamondan otish federasiyasi raisi lavozimiga taklif qilindi. Konferensiya ishtirokchilari bir ovozdan ushbu nomodni qo‘llab-quvvatladilar. Shu tariqa O.Imomov O‘zbekiston kamondan otish federasiyasining raisi lavozimiga saylandi.
Sir emaski, kamondan otish bo‘yicha O‘zbekiston jahonda yetakchi mamlakatlar qatorida e’tirof etilmaydi. Ammo, yangi rahbariyat kelajakda sportning ushbu turini rivojlantirish, ommalashtirishni maqsad qilgan.
“Asosiy maqsadimiz davlatimiz rahbari tomonidan sport yo‘nalishi bo‘yicha qo‘yilgan vazifalarni bajarishdir. Kelajakda yangidan-yangi marralarni zabt etamiz. Nasib qilsa Tokio 2020 Olimpiya o‘yinlariga nafakat lisenziya qo‘lga kiritamiz, balki medallar uchun ham harakat qilamiz”, – dedi federasiyaning yangi raisi Otabek Imomov.
Milliy olimpiya qo‘mitasi yangi rahbariyatga bu yo‘lda muvaffaqiyatlar tilaydi.
