O‘FA 1-vise-prezidenti Umid Ahmadjonov FIFA va OFK rahbariyati bilan uchrashuv chog‘ida yurtimizdagi futbol klublari shifokorlarining malakasini oshirish maqsadida, Toshkentda tibbiyot mavzusida turli seminarlar tashkil etish bo‘yicha kelishuvga erishgan edi. Ana shu kelishuvga ko‘ra  joriy yilning 9-12 oktyabr kunlari poytaxtimizda FIFA va OFKning tibbiyot mavzusidagi seminari bo‘lib o‘tadi.

Seminarni o‘tkazishdan asosiy maqsad yurtimizdagi futbol klublarida faoliyat olib borayotgan shifokorlarning malakasini oshirish, ularning professional darajalarini yuksaltirishdan iborat. Ma’lumki, Superliga formati o‘zgarganidan keyin futbol klublari tig‘iz taqvim ostida to‘p surmoqda. Futbolchilar qisqa vaqt ichida ko‘p o‘yin o‘tkazishga majbur bo‘lishyapti. Bu holatga futbolchilar organizmini tayyorlash, katta yuklamalardan keyin ularning tiklanish jarayonini tezlashtirish uchun zarur bo‘ladigan choralar haqida FIFA hamda OFKdan tashrif buyurgan mutaxassislar tomonidan qatnashchilarga ma’lumotlar beriladi.

Bundan tashqari, seminarda  futbolda shoshilinch tibbiy yordam ko‘rsatish hamda antidoping mavzusida nazariy bilimlar berilib, amaliy mashg‘ulotlar ham o‘tkaziladi.

Mazkur tadbirda Markaziy Osiyo futbol assosiasiyasi (CAFA)ga a’zo davlatlar ya’ni, Afg‘oniston, Tojikiston, Turkmaniston, Qirg‘iziston, Eron hamda O‘zbekistonning futbol klublaridan vakillar ishtirok etadilar. Seminar “Milliy” stadionning anjumanlar zalida tashkillashtiriladi.