O‘zbekiston Professional futbol ligasi hamda Ispaniya La ligasining hamkorlik qilish bo‘yicha kelishuvga asosan Ispaniya Primerosida ishtirok etayotgan “Eybar” klubining U-15 jamoasi O‘zbekistonga o‘rtoqlik o‘yini o‘tkazish uchun tashrif buyurgani.

Ertangi o‘yin oldidan O‘zbekiston o‘smirlar terma jamoasi bosh murabbiyi Azamat Abduraimov va “Eybar” U-15 jamoasi bosh murabbiyi Antxon Charola Eskuderolar ishtirokida matbuot anjumani bo‘lib o‘tdi.

Antxon Charola Eskudero: – Bu tashkil etilayotgan o‘rtoqlik o‘yini kelajakda yana ko‘plab tashkil etiladigan o‘zaro o‘yinlar uchun debocha bo‘lib xizmat qilishiga ishonaman. Qo‘l ostimdagi jamoani men bu yil qabul qilib oldim.

Ertangi o‘yin orqali jamoamning imkoniyatlarini sinovdan o‘tkazib olaman. Ispaniyada  11 yoshgacha bo‘lgan bolalar alohida maktabda shug‘ullanishadi. Keyin 11 yoshdan akademiyada o‘qish uchun ularda imkoniyat paydo bo‘ladi. Akademiyada 7 bosqichli o‘qish sistemasi yo‘lga qo‘yilgan.

Barcha bosqichdan muvaffaqiyatli o‘tgan futbolchilar “Eybar”ning asosiy jamoasida hamda boshqa professional klublarda o‘ynash imkoniga ega bo‘ladilar. Hozirda “Eybar” asosiy jamoasining 50 foizidan ortig‘i o‘z tarbiyalanuvchilarimizdan iborat. Bizda akademiyalar sport shaharchalariga aylantirilmoqda. Bu esa qamrovni yanada kengroq olish imkoniyatini beradi.

Eslatib o‘tamiz, O‘zbekiston o‘smirlar terma jamoasining “Eybar” U-15 jamoasiga qarshi bahsi 14 oktyabr kuni Toshkentdagi TTYMI stadionida bo‘lib o‘tadi. O‘yin soat 15:00da start oladi