2-3 noyabr kunlari Rossiya poytaxti Moskva shahrida Xalqaro havaskor boks assosiasiyasi (AIBA) ning navbatdagi Kongressi o‘tkazilmoqda.

Bugun mazkur Kongress o‘z ishini boshladi. Ushbu yirik tadbirda jahonning eng katta sport federasiyalaridan biri - AIBAga yangi rahbar saylanishi kutilmoqda.

Prezidentlik uchun asosiy nomzod hamyurtimiz G‘ofur Rahimov bo‘lib turibdi. Kongressda O‘zbekiston Milliy olimpiya qo‘mitasi prezidenti Umid Ahmadjonov ham bevosita ishtirok etmoqda. Shuningdek, Kongress doirasida boks rivoji yo‘lidagi bir qator masalalar muhokama qilinishi kutilmoqda.

Kun tartibidan o‘rin olgan eng asosiy masala albatta tashkilotga yangi rahbar saylashdir. Ertaga o‘tkaziladigan saylovda G‘ofur Rahimovga Osiyo boks federasiyasi rahbari, qozog‘istonlik Serik Konakbayev raqobat qilishi kutilmoqda.

Bugun Rahimov Kongress davomida so‘zga chiqdi va tashkilot rahbariga aylanganidan so‘ng qilingan ishlar haqida, jumladan AIBA qarzlaridan qutulgani, ayollar boksini rivojlantirish, boks Olimpiya o‘yinlari dasturidan chiqarib tashlanishiga yo‘l qo‘ymasligi haqida gapirdi.

Eslatib o‘tamiz, Ching Kuo Vu iste’foga chiqqach G‘ofur Rahimov AIBA'ga vaqtinchalik prezident vazifasini bajaruvchi etib tayinlangandi. Ertaga bo‘lib o‘tadigan saylovda AIBA prezidentligi masalasi uzil-kesil hal qilinadi.

Milliy olimpiya qo‘mitasi ushbu saylovda hamyurtimizga omad tilaydi.