«Chelsi» bosh murabbiyi Maurisio Sarri tan olib aytishicha, Angliya premyer-ligasini 10ta o‘yindan iborat mag‘lubiyatsiz seriya bilan boshlanishini kutmagandi. Jamoa navbatdagi turda ham mag‘lub bo‘lmasa, Liga rekordini takrorlashi mumkin.

«Men hozir rekordlar haqida o‘ylashni istamayman. Biz faqat o‘yin va ijobiy natija haqida o‘ylashimiz lozim. Rekord — bu shunchaki o‘yinlar hosilasi. O‘yinchilarga faqat o‘yinning o‘zi muhim ekanini tushuntirishim lozim.

Yo‘q, ijobiy natijalar bunchalik tez kelishini kutmagandim. Tajribamdan kelib chiqib aytadigan bo‘lsam, dastlabki 2 oy men uchun qiyin kechgan. Bu yerda ham shunday bo‘ladi, deb o‘ylagandim. Mening omadim keldi. Boisi, taktik jihatdan o‘yin yaxshi yo‘lga qo‘yilmagan bo‘lsa-da, futbolchilar o‘yin taqdirini hal qila olishyapti», — dedi Sarri klub matbuot xizmatiga bergan intervyusida.

«Chelsi» 24 ochko bilan Premyer-ligada 3-o‘rinni egallab turibdi. Londonliklar 7ta g‘alaba va 3 durang qayd etishgan. «Chelsi» 4 noyabr kuni «Stemford Brij»da «Kristal Pelas»ni qabul qiladi. O‘yin Toshkent vaqti bilan 21:00da start oladi.