«Челси» бош мураббийи Маурицио Сарри тан олиб айтишича, Англия премьер-лигасини 10та ўйиндан иборат мағлубиятсиз серия билан бошланишини кутмаганди. Жамоа навбатдаги турда ҳам мағлуб бўлмаса, Лига рекордини такрорлаши мумкин.

«Мен ҳозир рекордлар ҳақида ўйлашни истамайман. Биз фақат ўйин ва ижобий натижа ҳақида ўйлашимиз лозим. Рекорд — бу шунчаки ўйинлар ҳосиласи. Ўйинчиларга фақат ўйиннинг ўзи муҳим эканини тушунтиришим лозим.

Йўқ, ижобий натижалар бунчалик тез келишини кутмагандим. Тажрибамдан келиб чиқиб айтадиган бўлсам, дастлабки 2 ой мен учун қийин кечган. Бу ерда ҳам шундай бўлади, деб ўйлагандим. Менинг омадим келди. Боиси, тактик жиҳатдан ўйин яхши йўлга қўйилмаган бўлса-да, футболчилар ўйин тақдирини ҳал қила олишяпти», — деди Сарри клуб матбуот хизматига берган интервьюсида.

«Челси» 24 очко билан Премьер-лигада 3-ўринни эгаллаб турибди. Лондонликлар 7та ғалаба ва 3 дуранг қайд этишган. «Челси» 4 ноябрь куни «Стэмфорд Бриж»да «Кристал Пэлас»ни қабул қилади. Ўйин Тошкент вақти билан 21:00да старт олади.