Европа футболида Англия клубларининг Чемпионлар лигасидаги ҳаддан ташқари кўп сонидан норозилик кайфияти кучаймоқда. Жорий мавсумда АПЛнинг бир йўла 6 та жамоаси — «Манчестер Сити», «Ливерпуль», «Арсенал», «Ньюкасл», «Челси» ва «Тоттенхэм» мусобақада иштирок этди.

The Times нашрининг хабарига кўра, Европанинг етакчи клублари ва лигалари УЕФАга босим ўтказишга тайёрланмоқда. Уларнинг асосий талаби — бир мамлакатдан келадиган жамоалар сонини кўпи билан 5 та этиб белгилашдир. Норозиликнинг бош сабаби сифатида «энг бой чемпионатнинг янада бойиб бораётгани» ва инглиз клубларининг молиявий устунлиги туфайли бошқа лига вакилларини Европа Лигаси ҳамда Конференциялар Лигасидан ҳам сиқиб чиқараётгани кўрсатилмоқда.

Ҳозирча УЕФА 2026/27 йилги мавсум учун амалдаги тизимни ўзгартирмоқчи эмас. Бироқ ташкилот келгуси мавсумлар учун Европа клубларининг ушбу жиддий эътирозларини инобатга олишини маълум қилган.