"Манчестер Сити" ҳужумчиси Эрлинг Холанд келажакда фаолиятини Испания чемпионатида давом эттириши мумкин.
Таниқли инсайдер Маттео Мореттонинг фикрича, норвегиялик юлдузнинг кейинги клуби Ла Лига вакилларидан бири бўлади.
"Менимча, Холанднинг фаолиятидаги навбатдаги қадам Испания билан боғлиқ бўлади. Ҳозирча унинг айнан қайси жамоага ўтиши номаълум, аммо у ҳақиқатан ҳам Ла Лигада ўйнашни хоҳлайди.
Менга етиб келаётган маълумотларга қараганда, у эртами-кечми Испания чемпионатига йўл олади", — дея Мореттонинг сўзларини келтиради Madrid Universal.
Айни пайтда Холанднинг "Манчестер Сити" билан амалдаги шартномаси 2034 йилгача мўлжалланган. Шунга қарамай, турли манбалар футболчининг келишув муддати тугагунига қадар Англия клубини тарк этиши мумкинлигини тахмин қилмоқда.
Испанияда 26 ёшли ҳужумчини ўз сафига қўшиб олишга асосий даъвогарлар сифатида Мадриднинг "Реал" ва "Барселона" клублари тилга олинмоқда.
Transfermarkt портали Холанднинг ҳозирги трансфер қийматини 220 миллион еврога баҳоламоқда.
