APLning 11-turida «Chelsi» «Kristal Pelas»ni 3:1 hisobida yengdi. Natijada Maurisio Sarri jamoasi chempionatdagi mag‘lubiyatsiz seriyasini (8 g‘alaba, 3 durang) yana bir o‘yinga uzaytirishga muvaffaq bo‘ldi.
Kechagi bahsdan so‘ng Sarri APL tarixida debyut mavsumini eng muvaffaqiyatli boshlagan murabbiylar qatoridan joy oldi.
Italiyalik mutaxassis bu borada 1994 yilda «Nottinghem Forest»ni boshqargan Frenk Klarkning natijasini takrorladi. Klark qo‘l ostidagi jamoa 1994/95 yillar mavsumi yakunida chempion «Blekbern Rovers»dan 12 ochkoga ortda qolgan holda 3-o‘rinni egallagan edi.
Ma’lumot uchun, 59 yoshli Maurisio Sarri «ko‘klar» ustozi sifatida barcha musobaqalar doirasida 17 ta o‘yin o‘tkazib, 13 g‘alaba, 3 durang va 1 mag‘lubiyat qayd etdi. Uning yangi lavozimdagi ilk o‘yini Angliya Superligasi uchun «Manchester Siti»ga qarshi kechgan va 0:2 hisobidagi mag‘lubiyat bilan yakunlangan edi. Hozircha ushbu muvaffaqiyatsizlik 16 o‘yindan buyon so‘nggisi bo‘lib qolmoqda.
«Chelsi» 11 noyabr kuni 12-tur doirasida «Everton»ni qabul qiladi. Unga qadar 8 noyabr kuni Yevropa ligasida BATE maydoniga safar kutmoqda.
