"Liverpul" hujumchisi Muhammad Saloh Afrika millatlar kubogi saralash bosqichi doirasida bo‘lib o‘tgan Misr va Tunis terma jamoalari o‘rtasidagi o‘yinda g‘alaba to‘pini kiritishga muvaffaq bo‘ldi. Keyinchalik esa Saloh yosh o‘quvchidan uzr so‘rashiga to‘g‘ri keldi.
Muhammad gol urganidan keyin uchrashuv rejissyori tribunada banner ko‘tarib olgan qizni katta planda namoyish qildi. Qizaloq o‘z bannerida quyidagi so‘zlarni yozib olgandi: "Saloh, iltimos, gol ur. Men uyga ketishim kerak, mening uy vazifalarim bor".
Yuqorida aytganimizdek, Muhammad Saloh uchrashuvning 90-daqiqasida gol urdi. Misrlik futbolchi bu golni uzoq kuttirib qo‘ygani uchun yosh muxlisasidan uzr so‘radi.
"Men rostdan ham seni uyga ertaroq borishingni istagandim. So‘nggi daqiqaga qadar seni kuttirib qo‘yganim uchun meni kechir. Umid qilaman, ertaga sening o‘qituvching vaziyatni to‘g‘ri tushunadi", — deya yozdi Saloh o‘zining Tvitterdagi sahifasi orqali.
