"Ливерпуль" ҳужумчиси Муҳаммад Салоҳ Африка миллатлар кубоги саралаш босқичи доирасида бўлиб ўтган Миср ва Тунис терма жамоалари ўртасидаги ўйинда ғалаба тўпини киритишга муваффақ бўлди. Кейинчалик эса Салоҳ ёш ўқувчидан узр сўрашига тўғри келди.

Муҳаммад гол урганидан кейин учрашув режиссёри трибунада баннер кўтариб олган қизни катта планда намойиш қилди. Қизалоқ ўз баннерида қуйидаги сўзларни ёзиб олганди: "Салоҳ, илтимос, гол ур. Мен уйга кетишим керак, менинг уй вазифаларим бор".

Юқорида айтганимиздек, Муҳаммад Салоҳ учрашувнинг 90-дақиқасида гол урди. Мисрлик футболчи бу голни узоқ куттириб қўйгани учун ёш мухлисасидан узр сўради.

"Мен ростдан ҳам сени уйга эртароқ боришингни истагандим. Сўнгги дақиқага қадар сени куттириб қўйганим учун мени кечир. Умид қиламан, эртага сенинг ўқитувчинг вазиятни тўғри тушунади", — дея ёзди Салоҳ ўзининг Твиттердаги саҳифаси орқали.