O‘zbekiston futbol assosiasiyasi tomonidan yurtimizdagi futbol murabbiylarining malakasini oshirish va murabbiylikni rivojlantirish borasida bir qator chora-tadbirlar amalga oshirib kelinmoqda.
Jumladan, Toshkentda "Pro" diplomiga ega murabbiylarning bilimlarini yangilash bo‘yicha birinchi bosqich o‘quv-kurslari o‘tkazilmoqda. Mazkur o‘quv-kurslarida Islom Ahmedov instruktor sifatida, Oybek Davletmuradov koordinator sifatida faoliyat yuritmoqda. O‘quv kurslarida Mirjalol Qosimov, Igor Shkvirin, Baxtiyor Ashurmatov, Sergey Lushan, Azamat Abduraimov kabi taniqli mutaxassislar qatnashishyapti.
Murabbiylar bilan nazariy va amaliy mashg‘ulotlar olib borilmoqda. Birinchi bosqich yakuniga yetganidan keyin qatnashchilarga topshiriqlar beriladi. Murabbiylar mazkur topshiriqlarni ikkinchi bosqich o‘quv kurslari boshlangunga qadar bajarishlari kerak bo‘ladi. Ikkinchi bosqich o‘quv-kurslarini muvaffaqiyatli yakunlagan murabbiylar ikki yil davomida murabbiylik faoliyati bilan shug‘ullanishlari mumkin bo‘ladi.