Ўзбекистон футбол ассоциацияси томонидан юртимиздаги футбол мураббийларининг малакасини ошириш ва мураббийликни ривожлантириш борасида бир қатор чора-тадбирлар амалга ошириб келинмоқда.
Жумладан, Тошкентда "Про" дипломига эга мураббийларнинг билимларини янгилаш бўйича биринчи босқич ўқув-курслари ўтказилмоқда. Мазкур ўқув-курсларида Ислом Аҳмедов инструктор сифатида, Ойбек Давлетмурадов координатор сифатида фаолият юритмоқда. Ўқув курсларида Миржалол Қосимов, Игорь Шквирин, Бахтиёр Ашурматов, Сергей Лушан, Азамат Абдураимов каби таниқли мутахассислар қатнашишяпти.
Мураббийлар билан назарий ва амалий машғулотлар олиб борилмоқда. Биринчи босқич якунига етганидан кейин қатнашчиларга топшириқлар берилади. Мураббийлар мазкур топшириқларни иккинчи босқич ўқув курслари бошлангунга қадар бажаришлари керак бўлади. Иккинчи босқич ўқув-курсларини муваффақиятли якунлаган мураббийлар икки йил давомида мураббийлик фаолияти билан шуғулланишлари мумкин бўлади.