Avvalroq, Milliy olimpiya qo‘mitasida futbol bo‘yicha O‘zbekiston olimpiya terma jamoasi murabbiyi Ravshan Haydarov ishtirokida matbuot anjumani tashkil qilingani haqida xabar bergan edik.
Haydarovga yordamchi murabbiy Shuhrat Asatov, terma jamoa futbolchilari Husniddin G‘ofurov va Aziz Omonov hamrohlik qildi.
Anjumanda «Dubai Cup» musobaqasi yakunlari, O‘zbekiston Olimpiya terma jamoasining Tokio 2020 Olimpiadasiga atab ishlab chiqilgan strategiyasi, rejalar va yig‘inlar haqida ma’lumot berildi.
Azizbek Omonov: “Biz Birlashgan Arab Amirliklaridagi musobaqada chiroyli o‘yin bilan birgalikda g‘alaba qozonishni rejalashtirgandik.
Niyatimizga yetdik, bundan juda xursandman. Turnir yuqori darajada tashkil etilganini ham ta’kidlab o‘tmoqchiman.
Bu musobaqa orqali katta xalqaro tajribaga ega bo‘ldik. Mazkur tajribani rasmiy o‘yinlarda ishga solib, jamoamiz g‘alabasiga hissa qo‘shishga urinamiz”.
