Xabaringiz bor, yurtimizdagi sport federasiyalari bilan birga Tokio 2020 Olimpiadasi uchun strategiya ishlab chiqilgan. To‘rt yillikning eng nufuzli musobaqasiga tayyorgarlik yo‘lida O‘zbekistonda zamonaviy beshkurash sport turini rivojlantirish ham alohida o‘rin tutadi. Bu borada federasiya faoliyatini takomillashtirish katta ahamiyatga ega.
Shu munosabat bilan bugun, 3 dekabr kuni Milliy olimpiya qo‘mitasida O‘zbekiston zamonaviy beshkurash federasiyasining navbatdan tashqari hisobot-saylov konferensiyasi tashkil etildi. Tadbirda Milliy olimpiya qo‘mitasi Bosh kotibi Jasur Matchanov, O‘zbekiston yilqichilik va ot sporti, yengil atletika, qilichbozlik, suzish, o‘q otish federasiyalari vakillari hamda ommaviy axborot vositalari xodimlari ishtirok etishdi.
Konferensiyani O‘zbekiston Milliy olimpiya qo‘mitasi prezidentining maslahatchisi Nazirjon Xudoyqulov olib bordi. Kun tartibidan o‘rin olgan asosiy masala tashkilotga yangi rahbar saylab olishdan iborat edi. Federasiyaning avvalgi rahbari Farruh Fazliyev boshqa ishga o‘tgani munosabati bilan bo‘shab qolgan lavozimga bungacha O‘zbekiston yilqichilik va ot sporti federasiyasi raisi o‘rinbosari sifatida faoliyat olib borgan Bahrom Gaziyev nomzodi ilgari surildi. Konferensiya ishtirokchilari bir ovozdan B.Gaziyev nomzodini qo‘llab-quvvatlashdi va shu tariqa u O‘zbekiston zamonaviy beshkurash federasiyasi raisiga aylandi.
Milliy olimpiya qo‘mitasi rahbariyati federasiyaning yangi raisiga oldinda turgan mas’uliyatli vazifada muvaffaqiyatlar tiladi, federasiya faoliyatini rivojlantirish bo‘yicha tegishli ko‘rsatmalarni berdi. O‘z navbatida, Bahrom Gaziyev o‘z rejasi bilan barchani tanishtirdi. Asosiy maqsad – Tokio 2020 Olimpiya o‘yinlariga yo‘llanma qo‘lga kiritish ekanligini qayd etib o‘tdi.
Ma’lumot uchun, zamonaviy beshkurash sportida atletlar beshta yo‘nalish – qilichbozlik, suzish, ot sporti, yugurish va pistoletdan o‘q otish bo‘yicha kurash olib boradilar. Mazkur sport turi ilk marotaba 1912 yili Stokgolm mezbonlik qilgan Olimpiya o‘yinlarida dasturga kiritilgan.
