Biroz avval O‘zbekiston Milliy olimpiya qo‘mitasi prezidenti Umid Ahmadjonov Janubiy Koreyada Osiyo taekvondo ittifoqi rahbari Li Kyu Syok bilan uchrashib, bir qator muhim masalalarni muhokama qilgani haqida xabar qilgandik.
Mazkur uchrashuvda unga O‘zbekiston taekvondo WTF assosiasiyasi raisi Ahmadjon Rahimov hamrohlik qilmoqda.
Taekvondo masalasi bo‘yicha navbatdagi uchrashuv Janubiy Koreya madaniyat va sport vazirligi qoshidagi taekvondoni rivojlantirish davlat fondi raisi Sang Vuk Li bilan o‘tkazildi. Fondning asosiy faoliyati taekvondo WTFni dunyo bo‘ylab rivojlantirish va ommaviylashtirishdan iboratdir.
Uchrashuv davomida Markaziy Osiyoda taekvondo assosiasiyasining tashkil etilishi, mazkur assosiasiyaga a’zo mamlakatlar sportchilari o‘rtasida xalqaro musobaqalarni tashkil qilish va boshqa masalalar muhokama qilindi. O‘z navbatida, janob Li tashkiliy masalalarda yaqindan hamkorlik qilishga tayyor ekanligini aytib o‘tdi.
Shuningdek, uchrashuvda o‘zbekistonlik taekvondochilarning Muju shahrida joylashgan taekvondo markazida o‘quv-mashg‘ulot olib borishlari bo‘yicha kelishib olindi. Ma’lumot uchun, mazkur taekvondo markazi o‘z yo‘nalishida jahonda eng yirigi hisoblanadi.
U yerga yer yuzining turli mamlakatlaridan taekvondochilar tashrif buyurishadi va xalqaro o‘quv-mashg‘ulot yig‘inlarini o‘tkazadilar. Uchrashuvda nafaqat O‘zbekiston, balki Markaziy Osiyoda ham taekvondoni rivojlantirish fondi faoliyatini kuchaytirish bo‘yicha kelishuvga erishildi.
